മക്കള്‍ തുള്ളിച്ചാടി നടക്കുന്നതിനെതിരേ ബഹളം വെച്ചതൊക്കെ വെറുതെയാകുമോ? പാരീസ് ഒളിമ്പിക്‌സില്‍ പുതിയ ഇനമായി ചേര്‍ക്കാന്‍ നിര്‍ദ്ദേശിക്കപ്പെട്ട നാല് ഗെയ്മുകളില്‍ ബ്രേക്ക് ഡാന്‍സും! നിര്‍ദ്ദേശം അംഗീകരിക്കപ്പെട്ടാല്‍ ഡാന്‍സ് കളിച്ചാലും ഒളിമ്പ്യനാകും

ചുമ്മാ തുള്ളിക്കളിച്ചു നടന്നോ എന്ന് കുട്ടികളെ ശകാരിക്കാന്‍ വരട്ടെ. ചിലപ്പോള്‍ അവര്‍ ഭാവി ഒളിമ്പ്യന്മാരായേക്കും. 2024-ലെ പാരീസ് ഒളിമ്പിക്‌സില്‍ പുതിയ ഇനമായി ഉള്‍പ്പെടുത്താന്‍ നിര്‍ദേശിക്കപ്പെട്ടവയില്‍ ബ്രേക്ക് ഡാന്‍സുമുണ്ട്. കായികവേദിയില്‍ ബ്രേക്ക് ഡാന്‍സ് മത്സര ഇനമാക്കുന്നതിനെതിരേ അതിശക്തമായ വിമര്‍ശനം ഉയരുന്നുണ്ടെങ്കിലും, ഒളിമ്പിക്‌സിനെ കൂടുതല്‍ കലാപരമാക്കുന്നതിനും ന്യൂജന്‍ ആക്കുന്നതിനും ഇത് അത്യാവശ്യമാണെന്ന് സംഘാടക സമിതി ചെയര്‍മാന്‍ ടോണി എസ്റ്റാന്‍ക്വെ പറഞ്ഞു. ബ്രേക്ക് ഡാന്‍സ്, സര്‍ഫിങ്, ക്ലൈംബിങ്, സ്‌കേറ്റ്‌ബോര്‍ഡിങ് എന്നിവയാണ് 2024-ല്‍ പുതിയതായി ഉള്‍പ്പെടുത്തണമെന്ന് ആവശ്യപ്പെട്ട് സംഘാടക സമിതി അന്താരാഷ്ട്ര ഒളിമ്പിക് കമ്മിറ്റിക്ക് മുന്നില്‍ സമര്‍പ്പിച്ചിട്ടുള്ളത്. അന്തിമ തീരുമാനം ഒളിമ്പിക് കമ്മിറ്റിയാണ് എടുക്കേണ്ടത്. 2020 ഡിംസബറിനുള്ളില്‍ ഇക്കാര്യത്തില്‍ പ്രഖ്യാപനം വരും. എന്നാല്‍, നിര്‍ദേശത്തെക്കുറിച്ചുള്ള വാര്‍ത്ത പുറത്തുവന്നപ്പോള്‍തന്നെ കായികലോകത്തുനിന്ന് വലിയതോതിലുള്ള വിമര്‍ശനമാണ് ഉയര്‍ന്നിരിക്കുന്നത്. ഏപ്രില്‍ ഫൂള്‍ ഇക്കുറി നേരത്തെയാണോ എന്നാണ് ഒരാള്‍ പ്രതികരിച്ചത്. സ്‌ക്വാഷ് പോലുള്ള ഇനങ്ങളെ പുറത്തുനിര്‍ത്തി ബ്രേക്ക് ഡാന്‍സിന് ഇടം നല്‍കുന്നത് കടുത്ത അനീതിയാണെന്നും ചിലര്‍ അഭിപ്രായപ്പെട്ടു. എന്നാല്‍, ബ്രിട്ടീഷ് ബ്രേക്കിങ് ലീഗിന്റെ ഡയറക്ടര്‍ പാകോ ബോക്‌സിയെപ്പോലുള്ളവര്‍ നിര്‍ദേശത്തെ സ്വാഗതം ചെയ്തു. ബ്രേക്ക് ഡാന്‍സില്‍ കായികാധ്വാനമുണ്ടെന്നും പുതുതലമുറയ്ക്ക് ഏറെ ആവേശം പകരുന്ന കാര്യമായിരിക്കും ഇതെന്നും അദ്ദേഹം അഭിപ്രായപ്പെട്ടു. ബ്രേക്ക് ഡാന്‍സിനെ ഒരു കായികയിനമായി ഒളിമ്പിക്‌സില്‍ ഉള്‍പ്പെടുത്തണമെന്ന ആവശ്യം നേരത്തെ മുതല്‍ക്കുണ്ട്. 2018-ലെ യൂത്ത് ഒളിമ്പിക്‌സില്‍ ആദ്യമായി ഇതിടംപിടിച്ചു. ബംബിള്‍ബീ എന്ന പേരില്‍ മത്സരിച്ച റഷ്യയുടെ സെര്‍ജി ചെര്‍നിഷേവിനെയാരുന്നു ആണ്‍കുട്ടികളില്‍ ഈയിനത്തില്‍ സ്വര്‍ണം. ആണ്‍കുട്ടികളുടെയും പെണ്‍കുട്ടികളുടെയും വിഭാഗത്തില്‍ 12 പേര്‍ വീതമാണ് മത്സരിച്ചത്. ആണ്‍കുട്ടികളുടെയും പെണ്‍കുട്ടികളുടെയും വിഭാഗത്തിന് പുറമെ, മിക്‌സഡ് ഇനത്തിലും യൂത്ത് ഒളിമ്പിക്‌സില്‍ മത്സരമുണ്ടായിരുന്നു. ഇതാദ്യമായല്ല കലാകാരന്മാര്‍ക്ക് ഒളിമ്പിക്‌സില്‍ അവസരം ലഭിക്കുന്നത്. കവിതയെഴുത്ത് ഒരുകാലത്ത് ഒളിമ്പിക് ഇനമായിരുന്നുവെന്ന് പറഞ്ഞാല്‍ വിശ്വസിക്കുമോ? 1912 മുതല്‍ 1948 വരെ കവിതയെഴുത്തിലും മത്സരം നടന്നിരുന്നു. കവിതയുടെ പ്രമേയത്തിന് കായികലോകവുമായി ബന്ധമുണ്ടാകണമെന്നതു മാത്രമായിരുന്നു ഇതില്‍ നിഷ്‌കര്‍ഷിച്ചിരിക്കുന്നത്. ഇതിന് പുറമെ, ആര്‍ക്കിട്ടെച്ചര്‍, മ്യൂസിക്, പെയിന്റിങ്, ശില്പ നിര്‍മാണം എന്നിവയും ഈ കാലഘട്ടത്തില്‍ ഒളിമ്പിക് മത്സരയിനങ്ങളായിരുന്നു. കലാകാരന്മാര്‍ പ്രൊഫഷണലുകാണെന്ന് വിലയിരുത്തി 1954 ഒളിമ്പിക്‌സില്‍ ഇവ ഒഴിവാക്കുകയായിരുന്നു.

കായിക മേഖലയിലും പാക്കിസ്ഥാനെ ഒറ്റപ്പെടുത്തണമെന്ന് ആവശ്യമുയരുന്നു; ലോകകപ്പില്‍ പാക് ടീമിനെതിരായ മത്സരം ഇന്ത്യ ഉപേക്ഷിക്കണമെന്ന് ആവശ്യം; ബിസിസിഐയോട് അഭ്യര്‍ത്ഥനയുമായി ക്രിക്കറ്റ് ക്ലബ് ഓഫ് ഇന്ത്യ; ഒരു വിനോദവും രാജ്യത്തെക്കാള്‍ വലുതല്ലെന്നും ഇമ്രാന്‍ ഖാന്‍ വാ തുറക്കാത്തത് കുറ്റക്കാരനായതിനാലെന്നും സിസിഐ

മുംബൈ: പുല്‍വാമയില്‍ തീവ്രവാദ അക്രമത്തില്‍ 44 ജവാന്മാര്‍ കൊല്ലപ്പെട്ടതിന് പിന്നാലെ പാക്കിസ്ഥാന് മേല്‍ പല തരത്തിലുള്ള ഉപരോധം ഏര്‍പ്പെടുത്തുകയാണ് ഇന്ത്യ കായിക മേഖലയില്‍ ഉള്‍പ്പടെ ഇതിന്റെ തുടര്ച്ചയുണ്ടായി. തീവ്രവാദത്തിന് പിന്തുണ നല്‍കുന്ന പാക്കിസ്ഥാനെ എല്ലാ മേഖലയിലും ഒറ്റപ്പെടുത്തണം എന്ന സമീപനമാണ് പല കേണുകളില്‍ നിന്നും ഉയരുന്നത്. പാക്കിസ്ഥാന്റെ അഭ്യന്തര ടി20 ലീഗായ പിഎസ്എല്‍ ഇന്ത്യയില്‍ സംപ്രേഷണം ചെയ്യുന്നത് കഴിഞ്ഞ ദിവസം അവസാനിപ്പിച്ചിരുന്നു. ഈ വര്‍ഷം നടക്കുന്ന ഏകദിന ലോകകപ്പില്‍ പാക്കിസ്ഥാനെതിരെ ഇന്ത്യ കളിക്കരുത് എന്ന ആവശ്യമാണ് ക്രിക്കറ്റ് ക്ലബ്ബ് ഓഫ് ഇന്ത്യ സെക്രട്ടറി സുരേഷ് ബഫ്‌ന ഉയര്‍ത്തുന്നത്. രാജ്യം ഭീകരാക്രമണത്തിന്റെ ഞെട്ടലില്‍ നില്‍ക്കെ ലോകകപ്പില്‍ ഇന്ത്യ പാക്കിസ്ഥാനെതിരേ കളിക്കരുതെന്ന് ബി.സി.സിഐയോട് ആവശ്യപ്പെട്ടത്. ക്രിക്കറ്റ് ക്ലബ് ഓഫ് ഇന്ത്യ ഒരു കായിക സംഘടനയാണെങ്കിലും രാജ്യത്തിനാണ് പ്രഥമ പരിഗണനയെന്ന് സുരേഷ് ബഫ്ന പറഞ്ഞു. പുല്‍വാമ ആക്രമണത്തില്‍ പാക്കിസ്ഥാന്‍ പ്രധാനമന്ത്രി ഇമ്രാന്‍ ഖാന്‍ ഇതുവരെ പ്രതികരിച്ചിട്ടില്ല. അവരുടെ ഭാഗത്ത് എവിടെയോ തെറ്റുണ്ടെന്നാണ് ഇത് ചൂണ്ടിക്കാണിക്കുന്നത്. ഈ ആക്രമണത്തില്‍ പാക്കിസ്ഥാന് പങ്കില്ലെങ്കില്‍ ഇമ്രാന്‍ ഖാന് എന്തുകൊണ്ട് ഇതിനെതിരേ പ്രതികരിച്ചുകൂട-സുരേഷ് ചോദിച്ചു. പുല്‍വാമയിലെ ഭീകരാക്രമണത്തിന് പിന്നാലെ ക്രിക്കറ്റ് ക്ലബ് ഓഫ് ഇന്ത്യയിലെ ഇമ്രാന്‍ ഖാന്റെ ചിത്രം എടുത്തു മാറ്റിയിരുന്നു. ഇമ്രാന്‍ ഖാന്‍ പ്രതികരിക്കാത്തിടത്തോളം പാക്കിസ്ഥാന് ഈ സംഭവത്തില്‍ പങ്കുണ്ടെന്നാണ് വ്യക്തമാകുന്നത്. അതിനാലാണ് ആക്രമണത്തെ അപലപിച്ച് ഇമ്രാന്‍ ഖാന്റെ ഫോട്ടോ മാറ്റം ചെയ്തതെന്നും അവര്‍ പറഞ്ഞു.മെയ് മുപ്പതിനാണ് ഏകദിന ലോകകപ്പ് ആരംഭിക്കുന്നത്. ജൂണ്‍ 16-നാണ് ഇന്ത്യ-പാക്കിസ്ഥാന്‍ മത്സരം. നേരത്തെ പാക് താരങ്ങളുടെ ചിത്രങ്ങള്‍ പഞ്ചാബ് ക്രിക്കറ്റ് അസോസിയേഷന്‍ ഐഎസ് ബിന്ദ്ര സ്റ്റേഡിയത്തില്‍ നിന്നും മാറ്റിയിരുന്നു.

കാറപകടത്തില്‍ ഇന്ത്യന്‍ ക്രിക്കറ്റ് സുരേഷ് റെയ്ന മരിച്ചു; കൊന്നത് സോഷ്യല്‍ മീഡിയ; ദിവസങ്ങളായി പ്രചരിക്കുന്ന വ്യാജവാര്‍ത്തയില്‍ പൊട്ടിത്തെറിച്ച് താരം; വാര്‍ത്ത പ്രചരിപ്പിച്ചവര്‍ക്കെതിരെ കടുത്ത നടപടി

മുംബൈ: സോഷ്യല്‍ മീഡിയ പലരെയും പല തവണയായി കൊന്നിട്ടുണ്ട്. എന്നാല്‍ അതില്‍ മിക്കവരും ഇന്നും ഒരു കുഴപ്പവുമില്ലാതെ ജീവിച്ചിരിക്കുന്നു എന്നതാണ് വാസ്തവം. സിനിമാ താരങ്ങളും രാഷ്ട്രീയക്കാരും പല പ്രമുഖരും ഇത്തരം സോഷ്യല്‍ മീഡിയ കൊലപാതകങ്ങള്‍ക്ക് ഇരയായിട്ടുണ്ട്. അത്തരത്തില്‍ ഇത്തവണ സോഷ്യല്‍ മീഡിയയുടെ കൊലകത്തിക്ക് ഇരയായത് ഇന്ത്യന്‍ ക്രിക്കറ്റര്‍ സുരേഷ് റെയ്നയാണ്. ഇന്ത്യന്‍ ക്രിക്കറ്റ് താരം സുരേഷ് റെയ്‌ന വാഹനാപകടത്തില്‍ മരിച്ചെന്ന് സമൂഹമാധ്യമങ്ങളില്‍ വാര്‍ത്ത പ്രചരിക്കാന്‍ തുടങ്ങിയിട്ട് ദിവസങ്ങളായി. ഒടുവില്‍ ഇതില്‍ സഹികെട്ട് താരം തന്നെ പ്രതികരണവുമായി രംഗത്തെത്തിയിരിക്കുകയാണ്. താന്‍ ജീവനോടെയുണ്ടെന്നും വ്യാജ വാര്‍ത്ത പ്രചരിപ്പിച്ചവര്‍ക്കെതിരെ കര്‍ശന നടപടിയുണ്ടാകുമെന്നും റെയ്‌ന ട്വിറ്ററില്‍ വ്യക്തമാക്കി. 'കാറപകടത്തില്‍ താന്‍ മരിച്ചെന്ന് ദിവസങ്ങളായി വ്യാജ വാര്‍ത്തകള്‍ പ്രചരിക്കുന്നുണ്ട്. ഈ വാര്‍ത്ത തന്റെ കുടുംബത്തേയും സുഹൃത്തുക്കളെയും വേദനിപ്പിക്കുന്നു. ഇത്തരം വാര്‍ത്തകള്‍ തള്ളിക്കളയുക. ദൈവാനുഗ്രഹത്താല്‍ താന്‍ ജീവനോടെയുണ്ട്. വ്യാജ വാര്‍ത്ത പ്രചരിപ്പിച്ച യുടൂബ് ചാനലുകള്‍ റിപ്പോര്‍ട്ട് ചെയ്തിട്ടുണ്ട്. കടുത്ത നടപടിയുണ്ടാകുമെന്നാണ് പ്രതീക്ഷിക്കുന്നത്'- ഇന്ത്യന്‍ ക്രിക്കറ്റ് താരം ട്വീറ്റ് ചെയ്തു.

കൂടെ കളിക്കുന്ന ആരുമായും ഒരു താരതമ്യവും വേണ്ട; ലോകക്രിക്കറ്റില്‍ ഇന്ന് അവനെ വെല്ലാന്‍ ആരും ഇല്ല; എല്ലാ മേഖലയിലും ആധിപത്യം പുലര്‍ത്തുന്ന ഇന്ത്യന്‍ നായകന്‍ കോലിയെ പ്രശംസിച്ച് കുമാര്‍ സംഗക്കാര; കോടക്കണക്കിന് ആരാധകരുടെ പ്രതീക്ഷ സച്ചിന് ശേഷം കോലിയിലെന്നും സംഗ

ഡല്‍ഹി: ലോക ക്രിക്കറ്റില്‍ ഏതൊരു രാജ്യവും ആഗ്രഹിക്കും വിരാട് കോലിയെപ്പോലെ ഒരു താരം സ്വന്തം ലൈനപ്പില്‍ ഉണ്ടാകണമെന്ന്. ഇതിഹാസതാരങ്ങള്‍ക്കൊപ്പം ഇപ്പോള്‍ തന്നെ കോലി എത്തിപ്പെട്ടുവെന്ന് ഇന്ത്യന്‍ ആരാധകര്‍ അഭിപ്രായപ്പെടുന്നു. ഇപ്പോഴിത കോലിയെ വാനോളം പുകഴ്ത്തി രംഗത്തെത്തിയിരിക്കുകയാണ് മുന്‍ ശ്രീലങ്കന്‍ നായകന്‍ കുമാര്‍ സംഗക്കാര. ഒരു താരതമ്യവും വേണ്ടെന്നും ഇന്നത്തെ താരങ്ങളില്‍ ഏറ്റവും മികച്ചത് അവന്‍ മാത്രമാണ് എന്നുമാണ് സംഗ പറയുന്നത്. പ്രതിഭയുടെയും പ്രകടനത്തിന്റെയും കാര്യത്തില്‍ സമകാലികരായ എല്ലാ താരങ്ങളേക്കാളും ബഹുദൂരം മുന്നിലാണ് ഇന്ത്യന്‍ ക്യാപ്റ്റന്‍ വിരാട് കോഹ്ലിയെന്ന് സംഗക്കാര അടിവരയിട്ട് പറയുകയാണ്. ന്യൂസീലന്‍ഡ് ക്യാപ്റ്റന്‍ കെയ്ന്‍ വില്യംസന്‍, ഓസ്ട്രേലിയന്‍ താരം സ്റ്റീവ് സ്മിത്ത്, ഇംഗ്ലണ്ട് നായകന്‍ ജോ റൂട്ട് എന്നിവരെ താരതമ്യങ്ങള്‍ക്ക് വിധേയമാക്കുന്ന പതിവിനിടെയാണ്, കോഹ്ലിയാണ് ഏറ്റവും മികച്ച താരമെന്ന അഭിപ്രായവുമായി സംഗക്കാര രംഗത്തെത്തിയിരിക്കുന്നത്. 'ക്രിക്കറ്റുമായി ബന്ധപ്പെട്ട എല്ലാ കാര്യങ്ങളിലും കോഹ്ലി ഒരുപടി മുന്നിലാണ്. ലോകക്രിക്കറ്റില്‍ ഇപ്പോഴുള്ള എല്ലാവരേയുംകാള്‍ തലപ്പൊക്കം കോഹ്ലിക്കുണ്ട് എന്നു ഞാന്‍ കരുതുന്നു. ഭാവിയിലേക്കു നോക്കിയാലും, ഇതിഹാസതുല്യനായി വാഴ്ത്തപ്പെടാന്‍ പോകുന്ന താരമാണ് കോഹ്ലി. എക്കാലത്തെയും മികച്ച താരമാകാനുള്ള സാധ്യതപോലും കോഹ്ലിക്കു മുന്നിലുണ്ട്' സംഗക്കാര അഭിപ്രായപ്പെട്ടു. എല്ലാ ഫോര്‍മാറ്റിലും തിളങ്ങുന്ന കോഹ്ലിയുടെ പാടവം അസാമാന്യമാണെന്നും സംഗക്കാര ചൂണ്ടിക്കാട്ടി. 'റണ്‍സ് നേടുന്ന കാര്യത്തില്‍ അതുല്യമായ പ്രതിഭ കോഹ്ലിക്കുണ്ട്. സ്വയം വിശ്വസിക്കുന്ന മികച്ചൊരു ശൈലിയുമുണ്ട്' സംഗക്കാര പറഞ്ഞു.കോഹ്ലിയുടെ ബാറ്റിങ്ങിലെ ടെംപോ എപ്പോഴും ഏതാണ്ട് ഒരുപോലെയായിരിക്കും. സാഹചര്യങ്ങള്‍ മനസ്സിലാക്കി ബാറ്റു ചെയ്യാന്‍ അദ്ദേഹത്തിനാകും. കളിയോടുള്ള കോഹ്ലിയുടെ അഭിനിവേശവും ശ്രദ്ധേയം. വ്യക്തിയെന്ന നിലയിലും കളിക്കാരനെന്ന നിലയിലും കോഹ്ലി സ്വയം രൂപപ്പെടുത്തിയ രീതിയും പ്രശംസനീയമാണെന്ന് സംഗ അഭിപ്രായപ്പെട്ടു.