മറഡോണ ഗാര്‍ഹിക പീഡന കുറ്റവാളി' കളിക്കളത്തില്‍ പ്രതിഷേധവുമായി വനിത ഫുട്ബോള്‍ താരം; താരത്തിന് വധ ഭീഷണിയും, സ്പാനിഷ് താരം ഡപേനയെ അനുകൂലിച്ചും പ്രതികൂലിച്ചും നിരവധി പേര്‍

മഡ്രിഡ്: ഫുട്‌ബോള്‍ ഇതിഹാസം ഡീഗോ മറഡോണക്കെതിരെ പ്രതിഷേധവുമായി രംഗത്ത് വന്ന സ്പാനിഷ് വനിതാ ഫുട്‌ബോള്‍ താരം പൗല ഡപെനയ്ക്ക് വധഭീഷണി. കളിക്കളത്തില്‍ മറഡോണയെ ആദരിക്കാന്‍ നടന്ന മൗനമാചരിക്കല്‍ ചടങ്ങിലാണ് താരം പ്രതിഷേധിച്ചത്. മറഡോണ ഗാര്‍ഹിക പീഡന കുറ്റവാളിയാണെന്നും അങ്ങനെയൊരാളെ ആദരിക്കാന്‍ തന്നെ കിട്ടില്ലെന്നും പ്രഖ്യാപിച്ചാണ് സ്പാനിഷ് വനിതാ ഫുട്ബോള്‍ താരമായ പൗല ഡപെന പ്രതിഷേധം അറിയിച്ചത്. കഴിഞ്ഞ ദിവസം നടന്ന വിയാജെസ് ഇന്റെരിയാസ്- ഡിപോര്‍ടീവോ അബന്‍ക്ക മത്സരത്തിനു മുന്നോടിയായാണ് സംഭവം നടന്നത്. വിയാജെസിന്റെ താരമാണ് 24കാരിയായ ഡപെന. മത്സരം ആരംഭിക്കുന്നതിന് മുന്‍പ് ഇരു ടീമുകളുടേയും താരങ്ങള്‍ ഗ്രൗണ്ടില്‍ മറഡോണക്ക് ആദരാഞ്ജലികള്‍ അര്‍പ്പിക്കാനായി ഒരു നിമിഷം മൗനമായി നിന്നു. എന്നാല്‍ ഡപെന ഇതിനു തയ്യാറായില്ല. ടീം അംഗങ്ങള്‍ നിരന്നു നിന്നപ്പോള്‍ പുറം തിരിഞ്ഞ് നിലത്തിരുന്ന് കൊണ്ടാണ് ഡപേന തന്റെ പ്രതിഷേധം അറിയിച്ചത്. 'ഗാര്‍ഹിക പീഡന കുറ്റവാളിയായ ഒരാള്‍ക്ക് വേണ്ടി മൗനം ആചരിക്കാന്‍ എനിക്ക് താത്പര്യമില്ലായിരുന്നു. ചൂഷണത്തിന് ഇരയാകുന്നവര്‍ക്കായി ഒരു മിനിട്ട് മൗനമാചരിക്കാന്‍ സമയം ഇല്ല. അവരോട് ഒരു അനുഭാവവും ആര്‍ക്കും തോന്നുന്നില്ല. എന്നാല്‍ പീഡിപ്പിച്ച ആള്‍ക്ക് വേണ്ടി മൗനമാചരിക്കുന്നു. ഇതിനോട് എനിക്ക് ഒട്ടും യോജിക്കാന്‍ സാധിക്കുന്നില്ല'- ഡപെന പറഞ്ഞു. സംഭവത്തിന് ശേഷം ഡപേനയുടെ പ്രതിഷേധത്തില്‍ അവരെ പിന്തുണച്ചും വിമര്‍ശിച്ചും നിരവധി പേരാണ് രംഗത്തെത്തിയത്.'പ്രതിഷേധത്തിന് പിന്തുണ അറിയിച്ചുകൊണ്ട് പലരും വിളിച്ചിരുന്നു. എന്നാല്‍ അതേസമയം, തനിക്ക് നേരെ വധഭീഷണിയും ഉണ്ടായിട്ടുണ്ട്. ചില ടീമംഗങ്ങള്‍ക്ക് നേരെയും വധഭീഷണിയുണ്ട്.' പൗല ഡപേന പറഞ്ഞു. അതേസമയം 'മറഡോണ ഒരു അസാധാരണ കളിക്കാരനായിരുന്നു എന്ന കാര്യത്തില്‍ സംശയം ഇല്ല. എന്നാല്‍ ഒരു വ്യക്തി എന്ന അര്‍ഥത്തില്‍ അദ്ദേഹത്തിന് പല പോരായ്മകളുമുണ്ടായിരുന്നുവെന്നും സംഭവത്തിനുശേഷം ഒരു റേഡിയോക്ക് നല്‍കിയ അഭിമുഖത്തില്‍ ഡെപന പറഞ്ഞു. ചെയ്ത കാര്യത്തില്‍ പശ്ചാത്തപിക്കുന്നില്ലെന്നും അവര്‍ വ്യക്തമാക്കി.

ഐഎസ്എല്ലില്‍ കരുത്തരായ നോര്‍ത്ത് ഈസ്റ്റിന് വീണ്ടും സമനിലക്കുരുക്ക്; പന്തടക്കത്തില്‍ മുന്നിലെത്തിയിട്ടും 'ഹോം മാച്ചില്‍' ജയം നേടാനാവാതെ ഗോവ; കളിക്കിടെ പരിശീലകരുടെ വാക്കുതര്‍ക്കം; നാളെ മുംബൈ - ഈസ്റ്റ് ബംഗാള്‍ പോരാട്ടം

പനാജി: ഇന്ത്യന്‍ സൂപ്പര്‍ ലീഗിലെ ആവേശ പോരാട്ടത്തില്‍ കരുത്തരായ നോര്‍ത്ത് ഈസ്റ്റ് യുണൈറ്റഡിനെ സമനിലയില്‍ കുരുക്കി എഫ്.സി ഗോവ. ഇരുടീമുകളും ഓരോ ഗോളുകള്‍ വീതം നേടി. ഇരുഗോളുകളും ആദ്യ പകുതിയിലാണ് പിറന്നത്. നോര്‍ത്ത് ഈസ്റ്റിനായി ഇദ്രിസ സില്ല സ്‌കോര്‍ ചെയ്തപ്പോള്‍ ഗോവയ്ക്കായി ഇഗോര്‍ അംഗുളോ ഗോള്‍ മടക്കി. പാസിങ് ഗെയ്മുകളില്‍ പ്രാവീണ്യം തെളിയിച്ച ഇരു ടീമുകളും മികച്ച മുന്നേറ്റവുമായാണ് തുടങ്ങിയത്. നോര്‍ത്ത് ഈസ്റ്റിനായി ഇദ്രിസ സില്ലയും മറു തലക്കല്‍ ഇഗോള്‍ ആംഗുലുവും. ബ്രണ്ടന്‍ ഫെര്‍ണാണ്ടസിന്റെയും എഡു ബഡിയയുടെയും അളന്നു മുറിച്ചുള്ള പാസില്‍ നോര്‍ത്ത് ഈസ്റ്റ് ഗോള്‍ മുഖം പലതവണ വിറക്കപ്പെട്ടു. എന്നാല്‍, ആദ്യ ഗോള്‍ നേടിയത് നോര്‍ത്ത് ഈസ്റ്റാണ്. ഇദ്രീസ സില്ലയെ ഇവാന്‍ ഗെറീഡോ വീഴ്ത്തിയതിന് റഫറിയുടെ വിസില്‍. കിക്കെടുത്ത സില്ല (40) അനായാസം ഗോളാക്കുകയും ചെയ്തു. ഗോള്‍ വഴങ്ങിയതോടെ ഉണര്‍ന്നുകളിച്ച ഗോവ മൂന്നുമിനിറ്റുകള്‍ക്കുള്ളില്‍ ഗോള്‍ മടക്കി. ബ്രണ്ടന്‍ ഫെര്‍ണാണ്ടസിന്റെ വലതുവിങ്ങില്‍ നിന്നുള്ള ക്രോസ് രണ്ടു പ്രതിരോധ നിരക്കാരെ സാക്ഷിയാക്കി ഇഗോള്‍ അംഗുലോ (43) വഴിതരിച്ചുവിടുകയായിരുന്നു. നോര്‍ത്ത് ഈസ്റ്റ് ഗോളി സുഭാഷിഷ് റോയ്ക്ക് ഒന്നും ചെയ്യാനായില്ല. ആദ്യ പകുതിയില്‍ സ്‌കോര്‍ ചെയ്ത അംഗുളോ ഹെഡ്ഡറിലൂടെ വീണ്ടും ഗോള്‍ നേടാന്‍ ശ്രമിച്ചെങ്കിലും അത് പോസ്റ്റിനുമുകളിലൂടെ പറന്നു. 78-ാം മിനിട്ടില്‍ ഇരുടീമിലെയും പരിശീലകര്‍ തമ്മില്‍ വാക്കുതര്‍ക്കമുണ്ടായത് കളിയുടെ ആവേശത്തെ ബാധിച്ചു. 80-ാം മിനിട്ടില്‍ നോര്‍ത്ത് ഈസ്റ്റിന്റെ മഷാഡോ കിടിലന്‍ ലോങ് റേഞ്ചര്‍ എടുത്തെങ്കിലും ഗോളി അത് തട്ടിയകറ്റി. 83-ാം മിനിട്ടില്‍ നോഗുവെരയുടെ ഒരു കിടിലന്‍ ഷോട്ട് നോര്‍ത്ത് ഈസ്റ്റിന്റെ പോസ്റ്റില്‍ തട്ടിത്തെറിച്ചു. മത്സരത്തിന്റെ 75 ശതമാനം സമയവും പന്ത് കൈവശം വച്ചിട്ടും ഗോവക്ക് വച്ചിട്ടും ഗോവക്ക് ജയിക്കാനായില്ല. നോര്‍ത്ത് ഈസ്റ്റിന്റെ നായകന്‍ ലാലെങ്മാവിയയാണ് കളിയിലെ ഹീറോ ഓഫ് ദ മാച്ച് പുരസ്‌കാരം സ്വന്തമാക്കിയത്. ഐ.എസ്.എല്‍ ചരിത്രത്തിലെ ഏറ്റവും പ്രായം കുറഞ്ഞ നായകന്‍ എന്ന നേട്ടം താരം ഈ മത്സരത്തിലൂടെ സ്വന്തമാക്കിയിരുന്നു രണ്ടു സമനിലയും തോല്‍വിയുമുള്ള ഗോവ രണ്ടു പോയന്റുമായി ഏഴാം സ്ഥാനത്താണ്. അഞ്ചു പോയന്റുള്ള നോര്‍ത്ത് ഈസ്റ്റ് രണ്ടാമതാണ്. ആദ്യ ജയം തേടിയാണ് എഫ്.സി ഗോവ കളത്തിലിറങ്ങിയത്. പ്രഥമ മത്സരത്തില്‍ ബംഗളൂരുവിനോട് സമനിലയും രണ്ടാം മത്സരത്തില്‍ മുംബൈ സിറ്റി എഫ്.സിയോട് തോല്‍ക്കുകയും ചെയ്ത ഗോവക്ക് തിരിച്ചുവരവ് അനിവാര്യമായിരുന്നു

ഫുട്ബോള്‍ ദൈവത്തിന് കളിക്കളത്തില്‍ ആദരം ആര്‍പ്പിച്ച് മെസ്സി; ഗോള്‍ നേട്ടത്തിന് ശേഷം മറഡോണയുടെ ജഴ്‌സ് ധരിച്ച് കൈകള്‍ വാനിലേക്കുയര്‍ത്തി മെസ്സി; ആദരമര്‍പ്പിച്ചത് മരണത്തിന് ശേഷമുള്ള മെസ്സിയുടെയും ബാഴ്സയുടെയും ആദ്യ മത്സരത്തില്‍

ബാഴ്സലോണ: അന്തരിച്ച ഫുട്ബോള്‍ ഇതിഹാസം ഡീഗോ മാറഡോണയ്ക്ക് കളിക്കളത്തില്‍ ആദരമര്‍പ്പിച്ച് ലയണല്‍ മെസ്സി. സ്പാനിഷ് ലീഗില്‍ ഒസാസൂനയ്ക്കെതിരായ മത്സരത്തിലാണ് ബാഴ്സലോണ താരം തന്റെ ആരാധ്യപുരുഷന് ആദരം അര്‍പ്പിച്ചത്. മറഡോണയുടെ ജഴ്്‌സി ധരിച്ച് കൈകള്‍ വാനിലേക്കുയര്‍ത്തിയായിരുന്നു മെസ്സിയുടെ ആദരം. അര്‍ജന്റീന ക്ലബ് ന്യൂവെല്‍സ് ഓള്‍ഡ് ബോയ്സിലെ മാറഡോണയുടെ 10-ാം നമ്പര്‍ ജേഴ്സി ഉള്ളില്‍ ധരിച്ചായിരുന്നു മെസ്സി ഇന്നലെ കളിക്കിറങ്ങിയത്. 73-ാം മിനിറ്റില്‍ ഗോളടിച്ച ശേഷം മെസ്സി തന്റെ ബാഴ്സ ജേഴ്സി അഴിച്ച് മാറ്റി മാറഡോണയുടെ വിഖ്യാതമായ 10-ാം നമ്പര്‍ ജേഴ്സി പ്രദര്‍ശിപ്പിക്കുകയായിരുന്നു. ഇതിനു പിന്നാലെ കൈകള്‍ മുകളിലേക്കുയര്‍ത്തി ഇതിഹാസ താരത്തിന് ആദരമര്‍പ്പിക്കുകയും ചെയ്തു.1982-84 കാലയളവില്‍ ക്ലബിന്റെ താരമായിരുന്നു മറഡോണ.മാറഡോണയുടെ മരണത്തിന് ശേഷമുള്ള മെസ്സിയുടെയും ബാഴ്സയുടെയും ആദ്യ മത്സരമായിരുന്നു ഇത്. 73-ാം മിനിറ്റില്‍ രണ്ട് ഡിഫന്‍ഡര്‍മാരെ മറികടന്ന് ബോക്സിന്റെ പുറത്തുനിന്ന് തൊടുത്ത ഷോട്ട് മെസ്സി വലയിലെത്തിക്കുകയായിരുന്നു. ഒസാസൂനയെ എതിരില്ലാത്ത നാലു ഗോളുകള്‍ക്കാണ് ബാഴ്സ മറികടന്നത്. 29-ാം മിനിറ്റില്‍ മാര്‍ട്ടിന്‍ ബ്രാത്ത്വെയ്റ്റ്, 42-ാം മിനിറ്റില്‍ അന്റോയ്ന്‍ ഗ്രീസ്മാന്‍, 57-ാം മിനിറ്റില്‍ ഫിലിപ്പെ കുടീഞ്ഞ്യോ, 73-ാം മിനിറ്റില്‍ മെസ്സി എന്നിവരാണ് ബാഴ്സയുടെ ഗോളുകള്‍ നേടിയത്. ഒമ്പത് മത്സരങ്ങളില്‍ നിന്ന് 14 പോയന്റുമായി ബാഴ്സ ലീഗില്‍ ഏഴാം സ്ഥാനത്താണ്.

ഫുട്‌ബോള്‍ ലോകത്തിന് വീണ്ടും കണ്ണീരിന്റെ നനവ്; സെനഗല്‍ താരം പാപ്പ ബൂബ ദിയോപ് അന്തരിച്ചു; സെനഗലിന്റെ ലോകകപ്പ് ഹീറോയുടെ മരണം 42 ാം വയസ്സില്‍; 'ഒരിക്കല്‍ ലോകകപ്പ് ഹീറോയെങ്കില്‍, എക്കാലവും ലോകകപ്പ് ഹീറോ തന്നെ' താരത്തിന് ആദരവുമായി ഫിഫയുടെ ട്വീറ്റ്

സെനഗല്‍: ഫുട്‌ബോള്‍ ലോകത്തിന് വീണ്ടും കണ്ണുനീരിന്റെ നനവ് പടര്‍ത്തി സെനഗലിന്റെ മിഡ്ഫീല്‍ഡര്‍ പാപ്പ ബൂബ ദിയോപ് അന്തരിച്ചു.ഒറ്റ മത്സരം കൊണ്ട് താരമാകുക. അത്ര എളുപ്പത്തില്‍ സാധിക്കുന്ന കാര്യമല്ല അത്.. പ്രത്യേകിച്ചും ഫുട്‌ബോളില്‍. പക്ഷെ സെനഗല്‍ എന്ന രാജ്യത്തിന് വേണ്ടി ആദ്യ ലോകകപ്പില്‍ തന്നെ താരമാവുകയായിരുന്നു പാപ്പ ബൂബ ദിയോപ്. നിലവിലെ ചാംപ്യന്മാരെന്ന പകിട്ടോടെ എത്തിയ ഫ്രാന്‍സിനെ 2002 ലോകകപ്പിന്റെ ഉദ്ഘാടന മത്സരത്തില്‍ സെനഗല്‍ അട്ടിമറിച്ചപ്പോള്‍ വിജയഗോള്‍ നേടിയ മിഡ്ഫീല്‍ഡര്‍ പാപ്പ ബൂബ ദിയോപാണ്. 42 വയസ് മാത്രം പ്രായമുള്ളപ്പോഴാണ് ഫുട്‌ബോള്‍ ലോകത്തെ കണ്ണീരിലാഴ്ത്തി ദിയോപ് വിടപറയുന്നത്. ദീര്‍ഘനാളായി രോഗബാധിനായി ചികിത്സയിലായിരുന്നു താരം. താരത്തിന് ആദരവുമായി ഫിഫ രംഗത്ത് എത്തി.'ഒരിക്കല്‍ ലോകകപ്പ് ഹീറോയെങ്കില്‍, എക്കാലവും ലോകകപ്പ് ഹീറോ തന്നെ' ദിയോപിന്റെ മരണത്തിനു പിന്നാലെ രാജ്യാന്തര ഫുട്‌ബോള്‍ സംഘടനയായ ഫിഫ ട്വീറ്റ് ചെയ്തു. 2002 ലോകകപ്പില്‍ സെനഗല്‍ ക്വാര്‍ട്ടര്‍ ഫൈനലില്‍ കടന്ന് ചരിത്രം കുറിച്ചത് ദിയോപിന്റെ ബൂട്ടുകളുടെ കരുത്തിലാണ്. അന്ന് ഉദ്ഘാടന മത്സരത്തില്‍ കരുത്തരായ ഫ്രാന്‍സിനെതിരെ വിജയഗോള്‍ നേടിയതിനു പുറമെ, ഗ്രൂപ്പ് തല മത്സരത്തില്‍ യുറഗ്വായ്ക്കെതിരെ ഇരട്ടഗോളും സ്വന്തമാക്കി. ഈ മത്സരം 33ന് സമനിലയില്‍ പിരിഞ്ഞിരുന്നു. പ്രീക്വാര്‍ട്ടറില്‍ സ്വീഡനെ അട്ടിമറിച്ച സെനഗല്‍, ഒടുവില്‍ ക്വാര്‍ട്ടറില്‍ തുര്‍ക്കിയോടു തോറ്റാണ് പുറത്തായത്. നാലു തവണ ആഫ്രിക്ക നേഷന്‍സ് കപ്പില്‍ കളിച്ചു. 2002ല്‍ സെനഗല്‍ റണ്ണേഴ്‌സ് അപ്പ് ആയപ്പോള്‍ ടീമില്‍ അംഗമായിരുന്നു. സെനഗലിനായി 63 മത്സരങ്ങളില്‍നിന്ന് 11 ഗോളുകള്‍ നേടി. 2013ലാണ് രാജ്യന്തര ഫുട്‌ബോളില്‍നിന്ന് വിരമിച്ചത്. 2008ല്‍ പോര്‍ട്‌സ്മൗത്ത് എഫ്എ കപ്പ് നേടുമ്പോള്‍ ടീമിലെ നിര്‍ണായക സാന്നിധ്യമായിരുന്നു ദിയോപ്. ഇംഗ്ലിഷ് പ്രീമിയര്‍ ലീഗില്‍ ഫുള്‍ഹാം, പോര്‍ട്‌സ്മൗത്ത്, വെസ്റ്റ് ഹാം യുണൈറ്റഡ്, ബിര്‍മിങ്ങം സിറ്റി തുടങ്ങിയ ടീമുകള്‍ക്കായി കളിച്ചിട്ടുണ്ട്. ഇംഗ്ലണ്ടിനു പുറമെ ഫ്രാന്‍സ്, ഗ്രീസ് എന്നിവിടങ്ങളിലും വിവിധ ക്ലബ്ബുകള്‍ക്കായി കളിച്ചു